Mo-atubang si kanhi South Korean President Yoon Suk Yeol sa iyang unang pagdungog sa mga kaso sa insurrection karong adlawa, Abril 14, diin may kalabotan sa iyang pagkapakyas nga pagsuway sa pagdeklarar sa hamubo nga martial law niadtong Disyembre 2024.
Nasayran nga niadtong Disyembre 3, gimando ni Yoon ang pagsuspenso sa mga politikanhong kalihokan ug pagpatuman sa media censorship, nga milungtad lang og unom ka oras una gibalibaran sa oposisyon sa National Assembly.
Tungod niini, gi-impeach dayon siya ug niadtong Abril 4, kay hingpit na gayud kini nga gitangtang sa Constitutional Court sa iyang katungdanan.
Gidakop si Yoon niadtong Enero human nagdumili sa pag-surrender sa mga awtoridad sulod sa pipila ka semana, diin siya ang unang presidente sa South Korea nga gidakop samtang anaa sa posisyon.
Gibuhian kini human sa 52 ka adlaw, human gikuwestiyon sa korte ang legalidad sa iyang pagkabilanggo.
Ug sa iyang pagbalik sa pribadong kinabuhi niadtong Abril 11, nanamilit si Yoon sa publiko ug mipahibalo nga mangita siyag bag-ong dalan aron makaserbisyo pag-usab sa gobyerno.
Kung makonbikto, si Yoon mahimong mag-atubang sa tibuok kinabuhi nga pagkabilanggo o silot nga kamatayon.
Tungod sa iyang pagkatangtang sa katungdanan, ipahigayon ang snap election karong Hunyo 3 ning tuiga alang sa bag-ong presidente sa South Korea.
Sa pagkakaron, ang nasud gipangulohan pa ni Acting President Han Duck-soo.
