Mi-apply og political asylum si kanhi Philippine Charity Sweepstakes Office (PCSO) general manager ug retired police colonel Royima Garma, kinsang anaa karon nagpabilin sa detensyon sa Estados Unidos.
Matud sa abogado niini nga si Emerito Quilang, nga ang iyang kliyente nag-file alang sa asylum kaniadtong Nobyembre 2024 human sa iyang pagkasikop sa US tungod sa canceled visa niini.
Dugang ni Quilang nga adunay laing abogado ang nagrepresentar kang Garma sa kaso nga asylum.
Gipaambit usab niini nga mopasaka sila og counter affidavit karong Mayo 2 nga nagdumili sa iyang pagkalambigit sa kamatayon ni PCSO Board secretary Wesley Barayuga.
Niadtong Pebrero, ang National Bureau of Investigation (NBI) ug ang Philippine National Police misang-at og kasong murder ug frustrated murder atubangan sa DOJ batok kang Garma ug sa uban pang mga indibidwal tungod sa pagpatay kang Barayuga niadtong Hulyo 2020.
