CEBU-Gipasabot ni Cebu Governor Gwendolyn Garcia, nga ang mga gihimong pagsaway ni Senador Raffy Tulfo sa Cebu North Bus Terminal atol sa gihimo niini nga surprise inspection sa miaging semana kay dili ‘requirement’ inay option lang.
Mao kini ang iyang pagklaro sa dihang mibisita sa Cebu North Bus Terminal diin gipaagi pa sa komedya ang pagsunod sa gobernadora kang Tulfo atol sa Miyerkules Santo.
Human mangulo sa inspeksyon sa South Bus Terminal, milahos dayon si Garcia paingon sa North Bus Terminal kauban si Board Member Glenn Soco, ingon man sila si LTO 7 director Glen Galario ug LTFRB 7 director Eduardo Montealto Jr.
Dugang pagpasabot ni Garcia nga dili nila mamahimong mapalapdan ang terminal nga gi-inspeksyon ni Tulfo gumikan dili iya sa gobyerno ang yuta.
Sa pikas bahin, gipaambit ni Montealto subay sa ilang gihimo nga mga inspeksyon kay walay nakita nga anomalya ug mipasalig nga ang tanang mga byahe kay ‘road worthy’.
Ingon man nga mas gilauman pa nga modoble ang ihap sa mga pasahero nga moapas sa ilang tagsa-tagsa ka probinsya aron sa pagcelebrar sa Semana Santa hinungdan nga mas gipa-alerto ug mas gipahugtan pa sa mga otoridad ang ilang seguridad.
