CARCAR CITY-Nalumos-patay ang usa ka 16-anyos nga batang lalaki human nangaligo kini sa usa ka beach resort sa Sitio Bantayan, Barangay Tuyom sa dakbayan sa Carcar sa habagatang Sugbo niadtong Lunes sa udto, Abril 21, 2025.
Giila ang biktima nga si alyas Marcos, 16-anyos, tinun-an sa Grade 11 ug lumulupyo sa Sitio Lower Tawog, Barangay Valladolid, sa samang dakbayan kinsa gideklarang dead-on-arrival human gidala sa duol nga tambalanan.
Samtang laing kauban niini ang naluwas sa maogn pahitabo nga sila alyas Kimberly, 16-anyos, residente sa Sitio Kapatagan, Barangay Perrelos ug si alyas Jasmine, 18-anyos, residente sa Sitio Pergon, Barangay Valladolid kinsa anaa na karon sa stable condition.
Sumala pa sa inisyal nga imbestigasyon sa mga awtoridad nga nakadawat sila sa maong panghitabo pasado alas 3 sa hapon diin girespondihan dayon kini nila.
Panagtapok sa mga barkadang mag-classmates ang maong kalingawan diin nagsaulog sila sa usa sa ilang higala sa adlawng natawhan nga miabot sila sa maong resort pag alas 10 sa buntag sa maong adlaw.
Gani midalit pa sa ilang tabang ang mga lokal nga mananagat sa dapit human nasaksihan ang pagkalumos sa mga batan-on diin anaa na sa gilay-on nga 300 meters gikan sa baybayon.
Giabagan sa PH Coast Guard ang maong pag-rescue sa mga batan-on nga puros gidala sa Provincial Hospital sa Carcar.
