Tungod sa desisyon sa Fitch Ratings nga i-rate ang Pilipinas isip usa ka kasaligang nasud nga magpahulam og kuwarta nagpakita nga adunay pagsalig ang mga tigpamuhunan kung giunsa pagdumala ni Presidente Ferdinand R. Marcos Jr. ekonomiya sa Pilipinas.
Matod ni Department of Finance (DOF) Assistant Secretary Neil Cabiles, ang ordinaryong Pilipino ang makabenepisyo sa desisyon sa FITCH nga hatagan ang Pilipinas og “BBB” credit rating nga adunay stable nga panglantaw.
Ang “BBB” rating nga gihatag sa Pilipinas nagpakita nga ang default risk expectations sa pagkakaron ubos.
Nagpasabot usab kini nga ang Pilipinas gilauman nga adunay lig-on nga medium-term nga pagtubo, pagsuporta sa hinay-hinay nga pagkunhod sa utang sa gobyerno kalabot sa gross domestic product niini.
Si Cabiles miingon nga ang mga credit rating usa ka importante nga timailhan sa abilidad sa usa ka nasud sa pagtuman sa iyang pinansyal nga mga obligasyon.
Siya miingon nga ang “BBB” rating nagbutang sa Pilipinas nga lig-on sa investment-grade category, nga nagpakita sa lig-on nga kapasidad sa nasud sa pagbayad sa mga utang niini ug ubos nga risgo sa default.
Dugang pa niya nga ang na-affirmed nga rating makaapekto sa mga ordinaryong Pilipino sa duha ka mahinungdanong paagi.
Si Cabiles miingon nga ang mas lig-on nga credit rating sa gobyerno nagtugot kanila sa paghulam sa mas ubos nga interest rates, nga makapamenos sa gasto sa pagpondo sa dagkong mga proyekto sa imprastraktura ug sosyal nga kalamboan.
Ang opisyal sa DOF midugang nga ang positibo nga rating makadugang sa pagsalig sa mga mamumuhunan, nga makadani ug dugang langyaw nga pamuhunan ug makamugna og mga oportunidad sa trabaho alang sa mga Pilipino.(Bombo Irene Ardiente)
