Mipasalig ang Energy Task Force Election (ETFE) sa Department of Energy (DOE) sa ilang kaandam sa paghatag og padayon ug kasaligan nga supply sa kuryente sa tibuok nasod kalabot sa umaabot nga local and national election sa Mayo 12.
Matod ni Energy Undersecretary Felix William Fuentebella, adunay mga contingency plans ug ang Energy Task Force Election (ETFE) padayon nga nakig-alayon sa mga power producers, transmission operators, ug fuel providers aron masiguro ang luwas ug hapsay nga piniliay.
Lakip sa gihimo nga mga lakang mao ang pag-inspeksyon ug pagmentinar sa mga pasilidad sa DOE, pagsusi sa pre-election sa mga voting ug canvassing centers, ug pagseguro sa operational Uninterruptible Power Supply (UPS) sa Commission on Election (Comelec).
Nakigtambayayong usab ang ETFE sa nagkalain-laing ahensya sa gobyerno ug pribadong sektor, apil ang Philippine Independent Power Producers Association, National Power Corporation, National Grid Corporation of the Philippines (NGCP), Independent Energy Market Operator of the Philippines, National Electrification Administration, National Transmission Corporation, Power Sector Assets and Liabilities Management Corporation, generation companies, distribution utilities, electric cooperatives, ang Philippine National Oil Company ug ang Philippine National Oil Company alang sa pagpangandam.
Gani, masaligon ang DOE nga makaya niini ang gipaabot nga taas nga panginahanglan sa kuryente sa dili pa, atol, ug human sa 2025 nga piniliay.
