MANDAUE CITY-Desididong i-duso sa dakbayan sa Mandaue, ang pag-apil sa Sugbo Merkadong Barato nga programa sa pagpamaligya og P20 nga bugas matag-kilo, bisan paman nga wala kini ma-apil sa unang roll-out, diin gi-prayoridad ang mga lokal nga kagamhanan sa probinsiya sa Sugbo.
Matud pa ni Mandaue City Administrator Jamaal James Calipayan, nga nag-andam na ang dakbayan sa pagbaligya nga dili mominus sa 30-ka mga sako sa bugas sa higayon nga malangkob na sa sunod nga distribution phase.
Gipasabot ni Calipayan, nga gipahibalo ang City Agriculture Office nga ubay-ubay na nga mga LGU ang nakatakda na nga makadawat sa pag-apod-apod sa bugas, hinungdan nga wala malangkob ang Mandaue City bisan pa man sa ilang presensya atul sa paglusad.
Bisan pa niini, ang dakbayan nagpabilin nga malaumon ug naghinamhinam nga moapil atol sa sunod nga roll-out.
Sa pikas bahin, target sa siyudad sa Mandaue ang mga sektor nga narehistro na sa ID ug QR codes, lakip ang mga barangay workers, traffic enforcers, school personnel, ug uban pang frontline service providers.
Plano nga i-baligya ang bugas sa buhatan sa City Social Welfare and Services nga nga tukma sa presyo, ug walay tubo.
Kahinumdoman nga gikompirmar ni Gobernador Gwendolyn Garcia ang pag-hunong sa pagbaligya sa P20/kilo nga bugas hangtod Mayo 13, subay sa abiso sa Commission on Elections. | Bombo Nathaniel Sandoval
