Gipasalamatan sa Department of Education (DepEd) ang mga magtutudlo ug kawani sa mga pampublikong tunghaan nga nagserbisyo sa 2025 election.
Sa datos sa DepEd, kapin sa 660,000 ka personnel gikan sa ahensya ang nagsilbing poll workers sa tibuok nasod.
Matod ni Education Secretary Sonny Angara, ang tanang magtutudlo, poll workers, ug kawani sa tunghaan nga nagbantay maoy hinungdan nga hapsay ug luwas ang proseso sa piniliay.
Samtang, ang DepEd Election Task Force (ETF) Command Center nakatala og 603 ka mga election-related nga insidente gikan Mayo 11 hangtod Mayo 13 diin ang dagkong mga isyu naglakip sa mga malfunction sa vote counting machines, problema sa mga balota, resibo, ug voters’ list.
Apan, kadaghanan sa mga kaso nasulbad ra dayon, samtang ang uban gi-endorso sa Commission on Elections alang sa tukmang aksyon.
Hinungdan nga nanghinaot si Sherwin Gatchalian nga masiguro sa COMELEC nga ang mga magtutudlo nga nagsilbing poll workers makadawat sa ilang honoraria sa saktong oras.
Gitataw ni Gatchalian nga gawas sa pag-umol sa sunod nga henerasyon sa mga Pilipino, ang mga magtutudlo makonsiderar nga frontliners sa pagpreserbar sa demokrasya sa Pilipinas.
Giinsistir usab niini nga ang mga magtutudlo angayan nga makadawat sa labing taas nga pasidungog gikan sa tibuok nasud.
Nunot sa pag-aprobar ni Presidente Ferdinand R. Marcos Jr. sa compensation adjustment, kadtong nagsilbi isip chairperson sa electoral board makadawat og P12,000 nga honoraria; P11,000 para sa poll clerk ug ikatulo nga miyembro; ug P8,000 para sa support staff.
