Nakit-an na ang patayng lawas sa 77-anyos nga lalaki, kini human na- report nga missing, kini sumala sa Argao Municipal Police Station, nga aduna silay nadawat nga tawag gikan sa Barangay Secretary nga si Lowela Lonzaga Alburoalas, mga 10:02 sa buntag, Hunyo 24, 2025.
Busa, dali sila nga niresponde sa maong buhatan og na-ilhan ang maong biktima nga si Felicisimo Villegas Albite, ug personal usab kini nga giila sa iyahang asawa nga si Abregana Albite.
Sa inisyal nga imbestigasyon nga gihimo sa nirespondeng pulis, nasayran nga ang biktima niadto sa iyang umahan niadtong Hunyo 23, 2025, mga alas 9:00 sa buntag aron manguha og mga lubi.
Apan pagkagabii, wala gihapon mopauli ang biktima hinungdan nga gisugdan na sa pamilya ang pagpangita uban ang tabang sa mga opisyal sa barangay ug ubang mga residente sa lugar.
Sa sunod nga adlaw niini, Hunyo 24, 2025 sa buntag, nagpadayon ang pagpangita, ug ang biktima nakit-an sa usa ka sapa daplin sa dalan sa barangay nga walay timailhan nga buhi kini. | Bombo Irene Ardiente
