CEBU CITY- Malinawon nga nahuman ang katapusang sesyon sa 16th Sangguniang Panlungsod sa Cebu City gahapon Hunyo 25, 2025, diin ang mga konsehal mihatag sa ilahang “farewell speech” ug nagpasalamat sa ilang mga katawhan ug kauban sa konseho.
Sa ilang kataposang sesyon, ang mga konsehal mihatag ug mga panamilit nga pakigpulong ug nipasiugda sa ilang mga nahimo sulod sa tulo ka tuig nilang pagserbisyo.
Apil sa mga nabuhat sa maong konseho mao ang pagpasar sa 117 ka ordinansa, lakip na ang bag-ong zoning ordinance human sa kapin 25 ka tuig nga wala kini ma-update.
Gitukod usab ang Heritage District, ug napasa ang mga ordinansa alang sa pagpasidungog sa kultura ug kasaysayan sama sa Order of Rajah Tupas, Cebu Heritage Awards, ug Sangguniang Panlungsod Day.
Gipondohan usab ang ₱65 milyon nga repair ug upgrade sa Cebu City Sports Center isip preparasyon sa Palarong Pambansa.
Sumala pa ni outgoing Vice Mayor Donaldo “Dondon” Hontiveros, napakita sa konseho ang panaghiusa ug malasakit sa dakbayan, bisan pa man sa mga kalainan sa politika.
Gipahibalo usab nila nga anaa sa ₱12.1 bilyon ang total nga pondo sa dakbayan sa pagbalhin sa bag-ong administrasyon g walay utang ang siyudad.
Subay niini, gihinabi sa Bombo newsteam si Outgoing Cebu City Councilor Jocelyn Pesquera, ang majority floor leader sa kasamtangang konseho, dinhi malipayon niya nga gipahibalo nga hapsay ug maayo ang ilahang katapusan nga session.
Dugang pa niini, nga gipasiugda sa mga konsehal ang paglaum nga ipadayon sa 17th Sangguniang Panlungsod ang ilang mga nasugdan nga proyekto ug mga reporma.
Gipangutana usab kini kabahin sa zoning ordinance ilabi na nga siya ang nagmugna sa Ordinance No. 2784 (bag-ong Zoning Ordinance sa Cebu City), tungod kay kini naka-ani og lain-laing mga reaksyon, ilabi na sa mga vendors nga miyembro sa Cebu City United Vendors Association.
Dinhi gitubag ni Pesquera, nga nakalatid sa regulasyon ang pagseguro sa katungod sa mga nagpuyo sa residential zones, ilabi na ang socialized housing, aron dili basta-basta mapapahawa o mapahimulsan ang mga kabus.
Dugang pa niini nga dili angay mabalaka ang mga vendors tungod kay walay kausaban sa klasipikasyon kay commercial zone na kini sukad pa sa 1996 zoning ordinance, ug wala kini giusab sa bag-ong balaod.
Una na nga nipadangat sa ilahang mga kabalaka ang mga Vendors, nga basin maapektohan ang ilang lugar sa Carbon Market tungod sa zoning changes.
Gani, gikab-ot sa Bombo Radyo Cebu team ang bahin ni Maria Pino, ang Chairman sa Cebu City United Vendors Association,dinhi iyahang giyagyag nga nangayo sila og klaro nga konsultasyon, kay matod niya wala gipaminaw ang ilang mga sentimyento.
