ASTURIAS,CEBU- Patay ang usa ka batan-on samtang kritikal ang 2 ka mga igsoon niini human nga walay kalout nga gipanigbas sa ilang uyoan sa Barangay Owak lungsod sa Asturias sa kasadpang Sugbo niadtong Miyerkules sa sayong buntag, Hulyo 2, 2025.
Ang suspek kay giilang si George Batomalaque, 46-anyos diin dali kining nasikop human sa gilusad nga manhunt operation sa Asturias Municipal Police ngadto sa Barangay Vito sa silingang lungsod sa Balamban na kini nasikop human misurrender sa usa ka opisyal.
Samtang ang mga biktima kay giilang sila Kyle Padilla, 18-anyos ug gideklarang dead-on-arrival sa usa ka pampublikong tambalanan sa dakbayan sa Sugbo tungod sa mga samad-dinunggaban nga nahiaguman niini gikan sa talinis nga 12-pulgada nga kutsilyong gigamit sa suspek.
Ang laing biktima kay sila alyas “Gerald”, 10-anyos ug si alyas “Princess”, 8-anyos kinsa kritikal karon sa tambalanan tungod gihapon sa mga dinnunggaban nga nahiaguman niini.
Sumala sa inisyal nga imbestigasyon sa mga awtoridad kay matod pa nga ang mga biktima kay nangatulog niadtong higayona sa ilang kaugalingong lawak sa ilang panimalaysa dihang gisulong kini sa suspek.
Gani maayu nalang nga bisan sa mga samad kay nakadagan pa si alyas Princess kinsa nakapangayo og tabang sa mga kasilinganan.
Human sa panghitabo kay daling misibat ang suspek sa maong dapit samtang nagpadulong ang kapulisan og emergency responce team nga maoy nitabang sa mga biktima.
Samad sa ulo, agtang, likod, ug ubang bahin sa lawas ang nakuha sa mga biktima kinsa si Kyle maoy hilabihan nga nasamdan ginungdan sa iyang kamatayon.
Asoy sa imbestigador sa Asturias police nga dugay rang adunay kalagot ang suspek ngadto kang Kyle tungod sa giingong selos niini bisan paman nga pag-umangkon sa iyang asawa ang bata.
Nasayran usab nga adunay kalagot ang suspek sa amahan sa mga biktima, usa sa mga angulo nga ila karong gilantaw.
Sa pagkakaron, nabalhog sa Asturias Municipal Police Station ang suspek samtang giandam na niini ang kasong murder ug frustrated murder.
