-- ADVERTISEMENT --

Gipasalig ni Senador Risa Hontiveros nga wala siyay gibati nga giluiban taliwala sa mga taho nga sila si Senador Bam Aquino ug Kiko Pangilinan mahimong moapil sa majority bloc.

Matod ni Hontiveros nga iyang dawaton ang bisan unsang desisyon sa iyang mga kauban.

Ingon man nga tutokan sa senadora ang pagpadayon sa pagpalig-on sa oposisyon, dili lang sa sulod kon dili lakip na sa gawas sa Senado.

Hinuon giklaro ni Senador Risa nga bisan pa man sa mga hungihong nga nanggawas, dili pa kini final kon asa mobarog ang matag senador.

Gitataw niya nga ang pinal nga desisyon ug boto sa matag senador mahibaw-an sa Hulyo 28, sa dihang opisyal na nga ablihan ang ilang sesyon.

-- ADVERTISEMENT --

Sa laing bahin, sa usa ka pamahayag sa social media, si Senador Kiko niingon nga sila ni Senador Risa ug Senador Bam nag-estorya pa ug padayong maghisgot kon unsa man ang opisyal ug pinal nga desisyon sa Senado karong Hulyo 28.

Sa habig ni Pangilinan nga daan na niyang giingon nga abli kini sa pakigtambayayong sa tanang partido basta adunay klarong prinsipyo ug tinguha nga paubsan ang presyo sa pagkaon, mawagtang ang kagutom, ug tabangan ang mga mag-uuma ug mangingisda.

Gitataw sa senador nga nasayod siya kon kinsa siya ug unsay iyang gibarogan ug kini makita sa iyang track record.