Gialmahan ni Leyte 5th District Board Member Atty. Carlo Petilla-Loreto ang kalambuan nga i-dispose sa lungsod sa Isabel sa lalawigan sa Leyte ang mga medical waste nga gikan sa dakbayan sa Mandaue.
Gani gipa-summon niini ang Department of Environment and Natural Resources (DENR) ug ang nakontratang hauler sa Mandaue City Government nga Cleanaway Philippines Inc. ngadto sa Leyte Provincial Board aron sa pagpangayo og katin-awan sa maong pagproseso sa medical waste.
Atol sa pakighinabi niini sa usa ka mantalaan diri sa Sugbo, gisaysay ni Petilla-Loreto nga wala silay nadawat nga impormasyon kabahin sa pag-transport sa mga medical waste adto sa lungsod sa Isabel.
Gani naningil kini nga ang Leyte Provincial Board kay kinahanglan hatagan og katin-awan sa status sa maong mga waste material nga walay koordinasyon sa ilang lokal nga panggamhanan.
Gihimug-atan sa Leyte Provincial Board nga ang proseso kay dapat miagi sa mga Local Government Units niini gikan sa Barangay, Municipal, ug Provincial nga nahisubay sa ilang Environmental Code.
Dugang pa niya nga mas maayo nga ang mga basurang kinahanglan sa espesyal nga pag-handle kay adto iproseso kung asa gagikan.
Tataw niini nga ang Leyte kay dili dapat isipon nga dumpsite sa ubang mga lungsod ug dakbayan nga posibleng makamugna og lain napud nga problema sa kinaiyahan ug inpeksyon sa katilingban.
