Gikatahong niluwat isip legal counsel ang beteranong abogado nga si Lorna Kapunan sa billionaire gaming tycoon nga si Charlie “Atong” Ang, usa ka semana human siya nipasaka og reklamo batok sa whistleblower nga naglambigit ni Ang sa pagkawala ug giingong pagpatay sa kapin 30 ka mga sabungero.
Matod sa tinubdan, gipili ni Kapunan nga biyaan ang kaso aron tutukan ang iyang tahas isip volunteer private prosecutor sa umaabot nga impeachment trial ni Bise Presidente Sara Duterte.
Hinuon, ang mga lider sa Kamara gikataho nga gikonsiderar karon ang posibilidad nga matangtang siya sa prosecution panel tungod sa dili maayo nga optika nga gipahinabo sa isyu.
Sa pagkakaron, walay opisyal nga kompirmasyon gikan kang Atty. Kapunan kay nagkaduol na ang tentative schedule sa pagsugod sa trial nga gitakda ni Senate President Francis Escudero karong Hulyo 29.
Ingon man nga ang kaso ni Ang kay atimanon sa Rondain ug Mendiola Law Office.
