Maglangas-langas napud sa kadalanan ug mga nagkadaiyang dapit sa nasud ang mga Pro-Duterte Supporters sa umaabot adlaw nga Sabado, Hulyo 19 para sa ilang awhag nga ipabalik si kanhi Presidente Rodrigo Roa Duterte diri sa Pilipinas nga kasamtangang nagtingkagol sa International Criminal Court (ICC) Detention Center sa The Hague, Netherlands.
Gani ang mga Sugbuanong dumadapig sa politikanhong pamilyang Duterte kay nagkasinabot nga sila magtagbo sa Lagtang Gym sa dakbayan sa Talisay sa susamang adlaw gikan alas 6 sa hapon hangtod sa alas 10 sa gabii.
Gi-organisar kini sa Cebu United Parallel Groups diin gipanglantawan nilang liboan ang mutambong sa ilang tapok-tapok sa hinuusang singgit nga mauli na ang ilang pinalanggang “Tatay Digong”.
Gani sa eksklusibong pakighinabi sa Bombo Radyo Cebu Newsteam kang Moises Garcia Deiparine, ang dako-dako sa pundok nga Duterte Riders Team kay gisaysay niini nga pag-awhag sa administrasyong Marcos Jr. nga manumbalik ang kanhi Presidente Duterte.
Ingon nga imbitado nila ang pipila ka mga personalidad nga taga suporta sab sa mga Duterte diin usa niini ang bag-ong gobernadora sa Sugbo nga si Gov. Pamela “Pam” Baricuatro ug uban pa.
Dugang pa nga sa dili pa mutakna magsugod ang ilang programa sa Lagtang Gym, ang grupo kay magpahigayon sab og “Unity Ride” gikan sa Cansaga Bridge sa Consolacion tuyok sa Metro Cebu Tri-Cities sa Mandaue, Lapu-Lapu, ug Cebu City hangtod maabot sa dakbayan sa Talisay.
Abli ang maong kalihokan sa publiko diin giawhag sa mga organizers ang pagsalmot sa kadaghanan bisan man og dili diehard Duterte supporters aron lang mas mabati ang ilang gipadayag nga diri sa Pilipinas magasto sa kanhi Presidente Duterte ang iyang nahabiling oras sa kalibutan.
Kahinumduman nga gidakop sa gobyerno sa Pilipinas pinaagi sa gahum sa warrant of arrest sa ICC nga gipaagi sa diffusion order ngadto sa International Criminal Police Organization (Interpol) si Duterte tungod ra sab sa iyang kasong “crimes against humanities” sa dugoong pinatyanay sa mga inosenteng kinabuhi sa kataas sa war on drugs ubos sa iyang pamunuan.
