Nagtuo ang beteranong boxing analyst nga si Atty. Ed Tolentino nga kinahanglang modominar si 8-Division World Champion Manny “Pacman” Pacquiao sa sayong mga hugna batok ni Mario Barrios aron modaog sa gikatakdang away niini karong adlawa Hulyo 20 sa MGM Grand Garden Arena sa Las Vegas, Nevada.
Matod ni Tolentino, bisan tuod nga si Pacquiao nagbaton gihapon sa kaabtik ug gikusgon sa pagsumbag, dili ikalimod ang iyang edad ug seguradong maglisod siya niini.
Gipasabot sa beteranong analyst nga atol sa upat ka tuig nga break ni Pacquiao, ang iyang kaatbang nakatagbo na og dagkong mga pangalan sa natad sa boksing.
Apil niini sila si Gervonta Davis, Keith Thurman, ug Yordenis Ugas, kinsa mipildi mismo ni Pacquiao pinaagi sa unanimous decision niadtong 2021.
Matod niya nga dakong tabang ang maong mga away alang sa batan-ong boksidor aron makondisyon ang iyang kaugalingon ug masiguro nga molungtad siya sa ring, samtang makigsangka sa 46-anyos nga boxing legend.
Matod ni Atty. Tolentino, kinahanglang ipakita dayon ni Pacquiao ang iyang kusog sa unang mga hugna sa away ug kon mahimo, dili na kini i-extend og daghang round.
Nagtuo si Tolentino nga kon madugangan pa ang mga hugna sa away, makaya ni Barrios ang kusog ug kaabtik sa pambansang kamao.
Mihatag sab og ehemplo si Tolentino sa nahitabo dihang nag-atubangay sila si Pacquiao ug Thurman diin nakaya sa Pinoy nga boksidor ang mas batan-ong kontra sa unang round diin sa ulahi, matod niya, nakaya makigsabayan ni Thurman kang Pacquiao, ilabi na sa kataposang mga hugna sa away.
Gitambagan sa eksperto nga analyst sa kampo sa 8-Division World Champion ang boksidor nga ampingan usab ang iyang bitiis nga naproblema tungod sa pag-cramp sa paa.
Matod niya nga daghang away ang naagian sa boksidor ug siguradong dili luwas sa katigulangon ang iyang mga bitiis.
Nailhan si Pacquiao sa iyang maayong footwork ug daghang kombinasyon nga gipagawas isip signature na niini sa kapin sa 70 ka away nga iyang naagian.
