CEBU CITY- Nasikop sa mga sakop sa kapolisan ang usa ka 45-anyos nga babaye, sa Sitio Tabay, Barangay Guadalupe, Cebu City pasado 6:25 a.m. adlawng Martes, July 22, human nga namalit ug masuso sa balur nga P100,000
Gidakop si alyas Zel sa mga personahe sa City Investigation and Detective Management Unit (CIDMU) sa Cebu City Police Office pinaagi sa warrant of arrest sa paglapas sa Sections 4 ug 4(G) sa Republic Act 11862, o ang Expanded Anti-Trafficking in Persons Act of 2022.
Ang suspek kasamtangang gikustodiya sa Cebu City Police Office custodial facility ug ipaubos sa booking procedures.Nasayran usab atol sa pag-aresto sa suspitsado nga kinsa nalista isip ikaduhang most wanted person.
Nasikop usab ang ginikanan sa maong masuso gikan sa Barangay Duljo Fatima, niadtong Marso 7, 2025 tungod sa ilegal nga sugal. Nasayran usab nga dili kini ang unang higayon nga nisalmot ang magtiayon sa maong aktibidad, sanglit nahitabo usab kini sa miaging mga tuig.
Tungod niini, nihimo og rescue operation ang Department of Social Welfare and Services (DSWS) ug Cebu City Police Office ug gikustodiya ang mga menor de edad nga anak sa magtiayon.
Gisubay usab sa mga otoridad ang mipalit sa masuso sa kantidad nga P100,000. Apan P30,000 lang ang nadawat sa magtiayon, samtang P57,000 ang nakolekta sa middleman.
Kasong kalapasan sa Anti-Trafficking in Persons Act ang gipasaka batok sa suspek. Ang kaso gipasaka dayon ngadto sa korte human ang kapulisan nakatigom og lig-ong ebidensiya batok sa suspek. | Bombo Nathaniel Sandoval
