CEBU CITY- Botlog ang grado nga ihatag sa grupo sa mga progresibong mamumuo dinhi sa Sugbo ngadto kang Presidente Ferdinand “Bongbong” Marcos Jr. sa iyang umaabot nga ika-upat nga State of the Nation Address (SONA) nga nakatakda karong Lunes, Hulyo 28, 2025.
Kini ang hugot nga pamahayag ni Teody Navea, ang Secretary General sa Sanlakas Cebu, atol sa eksklusibong pakighinabi sa Bombo Radyo Cebu Newsteam niadtong Biyernes sa gabii, Hulyo 25.
Matod pa ni Navea, gigraduhan nilang “zero” o wala gyud’y puntos ang administrasyon Marcos tungod sa balik-balik nga mga saad nga wala gyuy natuman, ug ang kunohay mga solusyon sa problema sa katawhan walay usa nga tinud-anay nga na-implementar.
Gani, karong Lunes sa buntag, magpahigayon og lapad nga lihok-protesta ang Sanlakas Cebu, uban sa daghang progresibong grupo, sa Fuente Osmeña Rotunda ilawom sa ilang koalisyon nga Sugboanong Nagpakabana Alang sa Living Wage (SANA ALL).
Ang maong protesta mopanawagan sa pagtaas sa minimum wage isip panabla sa nagkataas nga inflation rate sa nasud.
Gibarugan sa grupo nga ang kasamtangang sweldo sa mga mamumuo dili na makatarunganon, ilabi pa sa padayon nga pagsaka sa mga presyo sa palaliton.
Sa tan-aw sa grupo, ang State of the Nation Address ni Marcos karong Lunes, dili na daw angay pa hulaton pa sa katawhan, tungod kay kapila na kining gipakyas sa pagtubag sa mga batakang panginahanglan sa masa.
