CEBU CITY- Gilusad sa dakbayan sa Sugbo ang “Oplan Pakigsandurot” sa Barrio Luz ug Barangay Guadalupe kagahapong adlawa sa Biyernes, Hulyo 25, 2025.
Sa Barrio Luz, kun diin unang gilusad kini, gitamboang ang kalihokan sa pag-abli sa programa nilang Cebu City Vice-Mayor Tomas “Tommy” Osmeña, City Councilors Harold Go, Francis Esparis, Paul Labra, Jose Abellanosa, Winston Pepito, Cebu City Police Office Deputy City Director Maria Theresa Macatangay, Barrio Luz Captain Renato Labrador, ug uban pa sa ilang pagpirma sa Pledge of Commitment sa tinguha nga mapalambo ang public safety sa lugar.
Samtang sa Barangay Guadalupe, nakatapok kini og 300 ka mga dedicated volunteers nga inabagan sa pakigtambayayong sa local barangay unit.
Ang primerong tumong sa programa kay nag pagtukod og mas lig-ong relasyon tali sa mga sakop sa kapulisan, lokal nga mga opisyal, ug mismong sa komunidad.
Nagduso kini sa peace and order, pagsulbad sa mga problema nga may kalabot ang kaluwasan sa publiko, pagdani sa komunidad nga musalmot sa mga kalihokan makapugong sa mga kriminalidad, ug pagdalit sa basic government services aron mahimuslan sa mga residente.
Pipila lang sa pasiugdahang kalihukan ani mao nag patrol ug police visibility sa mga kabarangayan.
