CENTRAL VISAYAS- Misaka na sa 13 ka buok ang gidaghanon sa mga indibidwal nga gikusahan kalabot sa giingong online scam hub nga nahimutang sa I.T. Park, Cebu City, human gipasakaan og kaso ang laing unom ka dugang nga suspek.
Matod sa imbestigasyon sa Regional Anti-Cybercrime Unit 7 (RACU 7), nga gipangulohan ni Police Lieutenant Colonel Jumark Caña, Assistant Chief ug Team Leader sa Cebu Cyber Response Team, ang reklamo batok sa unom ka indibidwal gisang-at na ngadto sa Office of the City Prosecutor sa Department of Justice sa Guadalupe, Cebu City niadtong Hulyo 25, 2025.
Ang lakang gihimo ubos sa pagdumala ni Police Colonel Wilfredo Velayo Jr., Officer-in-Charge sa RACU 7.
Gipasakaan og kasong paglapas sa Section 11 (Investment Fraud) sa Republic Act 11765 o Financial Products and Services Consumer Protection Act, ug Section 6 sa Republic Act 10175 o Cybercrime Prevention Act of 2012 ang maong mga suspek.
Ang mga giingong nalambigit sa illegal nga kalihokan giila sa ilang mga alyas nga mao sila Smakdat, Dan, Tony, Ann, Nav, ug Jessa. Giingon nga sila maoy nagpaluyo sa pagpahigayon og online investment fraud nga mitarget sa mga inosenteng biktima.
Karon, samtang nagpadayon pa ang pinal nga ebalwasyon ug resolusyon sa kaso sa Prosecutor’s Office, nangayo og kooperasyon ang RACU 7 sa publiko nga magpabiling mabinantayon sa tanang matang sa online nga transaksyon.
Gi-awhag usab ang tanan nga ipahibalo dayon sa mga otoridad ang bisan unsang kadudahang kalihokan nga may kalambigitan sa pinansyal o cybercrime pinaagi sa ilang mga hotline.
