Mipaspas pa ang pagtubo sa ekonomiya sa Pilipinas og 5.5% sa ikaduhang kwarter sa 2025.
Matud ni Philippine Statistics Authority (PSA) USec. ug National Statistician Dennis Mapa nga ang gross domestic product (GDP) o ang bili sa mga butang ug mga serbisyo nga gihimo sa usa ka period niuswag og gamay sa 5.5% sa Abril ngadto sa Hunyo ning tuiga.
Mas taas kini sa 5.4% nga pagtubo sa ekonomiya nga natala gikan sa Enero hangtod Marso 2025.
Ang GDP sa ikaduhang quarter mao ang labing paspas nga pagtubo nga natala sa miaging upat ka quarters, bisan kung kini hinay kung itandi sa 6.5% nga natala sa ikaduhang quarter sa 2024.
Gipasabot sa hepe sa PSA nga ang nag-unang sektor nga nakatampo sa paglambo sa ekonomiya sa ikaduhang kwarter mao ang agrikultura, kalasangan ug pangisda nga nakatala og 7.0% nga growth rate ingon man ang industriya nga nitala og 2.1% ug mga serbisyo nga adunay 6.9%.
Samtang, si Department of Economy, Planning and Development (DEPDev) Secretary Arsenio Balisacan namatikdan nga ang ekonomiya sa nasud nagpabilin nga lig-on bisan pa sa nagpadayon nga global nga mga hagit ug mga paglihok sa presyo sa mga produkto sa lana ug uban pang kawalay kasiguruhan.
Matud pa usab sa kalihim nga ang economic performance sa ikaduhang quarter nagmintinar sa Pilipinas isip usa sa labing paspas nga pagtubo sa ekonomiya sa Asya, sunod sa Vietnam (8.0%), apan nalabwan ang China, nga nitala og 5.2%, ug Indonesia, nga adunay 5.1% nga pagtubo sa ekonomiya.
Gipasabot usab sa kalihim nga ang nag-unang nakatampo sa maayong pasundayag sa ekonomiya sa ikaduhang kwarter mao ang pagbangon sa sektor sa agrikultura sa nasod sa 7% nga growth rate gikan sa 2.2% sa unang quarter sa 2025. Kini tungod sa pagsaka sa ani sa humay.
Ang paghinay sa inflation nakatabang usab sa pagsuporta sa konsumo sa panimalay, nga misaka sa 5.5% year-on-year sa ikaduhang quarter, ang pinakapaspas nga pagtubo sukad sa unang quarter sa 2023.
