Nipadayag og kasagmuyo si Senador Francis “Kiko” Pangilinan sa desisyon sa Senado nga i-archive ang impeachment complaint batok kang Bise Presidente Sara Duterte, ug nipasidaan nga huyang kini nga tubag taliwala sa desisyon sa Korte Suprema.
Atol sa sesyon niadtong Miyerkules, Agosto 6, si Pangilinan maoy usa sa lima ka senador nga misupak sa mosyon ni Senador Rodante Marcoleta nga i-postpone ang Articles of Impeachment.
Matod niya, makonsiderar nga “premature” ang nasangpit nga lakang ilabi na kay adunay pending nga Motion for Reconsideration sa Korte Suprema kalabot sa maong isyu.
Sa ekslusibong pakighinabi sa Bombo Radyo Cebu Newsteam sa Senador, iyang gitataw nga ang impeachment dili lang usa ka yanong proseso sa politika, kondili usa ka importanteng mekanismo nga gitukod sa Konstitusyon aron mapabilin ang pagsalig sa katawhan sa mga tag-as nga opisyal sa gobyerno.
Gihatagan usab niya og gibug-aton nga dili kini basta-basta isalikway tungod lang sa kasayon o interes sa politika tungod kay ang impeachment alang sa tulubagon, ug alang sa katawhan.
