Susihon sa dakbayan sa Mandaue kon duna bay kontrata sa Kagamhanan sa Probinsiya sa Sugbo alang sa programa sa bugas humay sa Sugbo Merkado Barato (SMB) sa dili pa kini husayon ang bisan unsang obligasyon ug utang niini.
Matud ni Mayor Thadeo “Jonkie” Ouano, nga gusto niini nga klaruhon una ang kasabutan sa dili pa matubag ang mga bayranan niini.
Kini human gikompirmar sa mga opisyal nga ang 397 ka sako sa SMB rice nga gihipos sa usa ka bodega sa Barangay Tawason, Mandaue dili na luwas nga kan-on sa tawo.
Plano usab sa awtoridad nga ipadala ang wala pa maabli nga mga sako sa Department of Agriculture Regional Office, alang sa dugang nga pag-examine, bisan paman nga gidili na kini nga ipang apud-apod.
Mibutyag usab si City Administrator Atty. Gonzalo Malig-on Jr., nga wala’y Memorandum of Agreement (MOA) tali sa duha ka lokal nga kagamhanan ang nakapugong sa plano sa dakbayan nga ilabay ang bugas ug husayon ang wala mabayri nga balanse niini sa probinsiya.
Gikonsiderar usab sa dakbayan nga ibalik ang sobra ngadto sa probinsya, apan kung wala ang MOA, dili matino sa mga opisyal kung gi-deliver kini pinaagi sa consignment o bayran naba atol sa pagdeliver niini.
Gihangyo usab sa pagpasabot ang buhatan sa City Social Welfare and Services (CSWS), nga nagpatuman sa programa sa lokal, kung nganong wala kini maapod-apod ang bugas bisan pa nga usa ka tuig na ang milabay human sa tuig 2023 nga pagdeliver niini.
Gisupak ni Malig-on ang pangangkon sa CSWS nga ang barangay election ban maoy usa sa nakapapugong sa pag-apod-apod, tungod kay ang ban milungtad lamang og 10 ka adlaw niadtong Oktubre 2023 ug nga walay nahitabong election ban sa 2024. | via Bombo Nathaniel Sandoval
