CENTRAL VISAYAS- Nasikop ang tulo ka personalidad nga giila nga mga Top Most Wanted sa regional ug probinsyal nga lebel atol sa sunodsunod ug koordinadong operasyon sa Police Regional Office 7 (PRO-7) sa lalawigan sa Sugbo.
Ang mga operasyon gihimo pinaagi sa hiniusang lihok sa mga lokal nga kapulisan, regional units, ug mga national operatives, nga misangpot sa kalampusan sa pagdakop sa mga dugay nang ginapangita nga mga suspek.
Una nga nadakpan mao ang usa ka 36-anyos nga lalaki nga giilang Top 5 Most Wanted sa rehiyon.
Nasikop siya sa lungsod sa Madridejos, Cebu pinaagi sa joint operation sa Madridejos Municipal Police Station (CPPO), Police Station 11 (CCPO), ug Cebu Provincial Intelligence Team (RIU 7). Giatubang niya ang kasong Murder, nga adunay silot nga reclusion perpetua o tibuok kinabuhing pagkabilanggo, ug walay piyansa.
Sunod nga nadakpan sa Danao City mao ang usa usab ka lalaki nga sakop sa regional Top Most Wanted list.
Gidakop siya sa operasyon sa 701st Maneuver Company (RMFB7), Danao City Police Station (CPPO), ug City Mobile Force Company (LCPO).
Giatubang niya ang kasong Sexual Assault ubos sa Republic Act 7610, nga silotan og prision mayor (unom ngadto sa dose ka tuig nga pagkabilanggo), ug gitakda ang piyansa nga ₱180,000.
Katapusan nga nasikop mao ang usa ka 36-anyos nga lalaki nga nalakip sa Top 10 Most Wanted sa probinsya.
Nadakpan siya sa coordinated operation sa Damulog Municipal Police Station (Bukidnon PPO, PRO 10), Police Station 6 (MCPO), ug Women and Children’s Protection Desk (MCPO). Giatubang niya ang kasong Rape ubos sa Article 266-A sa Revised Penal Code, nga may silot nga reclusion perpetua ug walay piyansa.
Karon, ang tulo ka mga dinakpan anaa na sa kustodiya sa ilang tagsa-tagsa ka police units samtang nagpaabot sa ilang pormal nga presentasyon sa korte nga nag-isyu sa warrant of arrest.
