PROVINCE OF CEBU- Midonar og mga stretchers, hospital beds, ug laboratory equipment ang Kagamhanang Lalawigan sa Sugbo ngadto sa Rural Health Unit (RHU) sa lungsod sa Compostela, amihanang Sugbo, aron palig-onon ang kapasidad sa pasilidad sa paghatag og dekalidad nga serbisyong panglawas sa mga lumulupyo.
Sumala ni Municipal Health Officer Dr. Rhoda Mae Alfonsa Chua, ang birthing center sa RHU karon makahandle na og upat ka dungan nga deliveries, samtang ang laboratoryo niini kay adunay pasilidad alang sa blood chemistry, urinalysis, ug X-ray procedures.
Naghatag usab ang RHU og outpatient services sama sa medical consultations ug first-aid treatment para sa trauma cases, nga nagpasabot nga mas dinalian ug accessible ang serbisyo alang sa katawhan sa lungsod.
Personal nga giinspeksyon ni Cebu Provincial Governor Pamela “Pam” Baricuatro ang Compostela RHU niadtong Martes, Agosto 12, diin siya gisugat nila Compostela Mayor Felijur Quiño, Vice Mayor Froilan Quiño, ug uban pang mga opisyal sa lungsod.
Gipasiugda ni Gov. Baricuatro ang kahinungdanon sa accessible nga healthcare.
Gi-awhag usab niya ang tanang opisyales nga magkahiusa sa paghatod sa mga batakang serbisyo alang sa katawhan.
