Subling giduso ni Senate Minority Leader Vicente “Tito” Sotto III ang pagpatuman sa random drug testing sulod sa Senado aron maseguro nga magpabiling drug-free ang iyang konstituwente.
Matod ni Sotto, iyang gipatuman ang nasangpit nga programa sa dihang siya pa ang Senate President sa 18th Congress, diin 300 ka mga empleyado sa Senado ang gipaubos sa surprise drug test nga pulos negatibo.
Bisan ang mga senador nga boluntaryong nipaubos sa testing kay nagnegatibo usab.
Apan nahunong ang programa human sa iyang termino isip lider sa Senado.
Nitumaw ang maong sugyot taliwala sa padayong imbestigasyon sa usa ka kawani ni Senador Robin Padilla nga gidudahang tiggamitan og ilegal nga drugas sulod sa edipisyo sa Senado.
Bisan og wala pay opisyal nga resulta, gipasiugda ni Sotto ang kamahinungdanon sa preventive measures aron mamintinar ang integridad sa institusyon.
Ingon man nga una nang gihimakak sa suspetsadong empleyado ang paggamit sa ilegal nga drugas.
Ang random drug testing kabahin sa mas lapad nga kampanya sa gobyerno batok sa ilegal nga drugas, subay sa Republic Act No. 9165 o Comprehensive Dangerous Drugs Act of 2002.
Ubos sa balaod, ang mga kawani sa gobyerno mahimong ipaubos sa drug testing isip kabahin sa workplace safety protocols.
Nagtuo si Sotto nga ang pagpabalik sa programa dili lang makapalig-on sa pagsalig sa publiko sa Senado, kondili magsilbi usab nga pasidaan sa bisan kinsa nga mosuway pagdala o paggamit og drugas sulod sa institusyon.
