MANDAUE CITY,CEBU- Gibakwit ang kapin 1,246 ka tawo gikan sa nagkalain-laing barangay sa Mandaue City tungod sa grabeng pagbaha nga resulta sa walay hunong nga ulan kagabii, Agosto 15.
Matod ni Michael Pialago, hepe sa City Social Welfare Services (CSWS) sa Mandaue, sa pakighinabi sa Bombo Newsteam, sayo pa sa buntag sa Sabado, Agosto 16, adunay labing menos 317 ka pamilya nga napugos pagpasilong sa mga evacuation center sa tibuok siyudad.
Ang mga evacuation centers naglakip sa mosunod:
Maguikay National High School – 55 ka pamilya, 179 ka indibidwal
Tabok National High School – 74 ka pamilya, 322 ka indibidwal
Umapad Elementary School – 188 ka pamilya, 745 ka indibidwal
Sa pagkakaron, wala pa’y mga evacuees nga na-report sa Barangay Casuntingan, subay sa kasayuran gikan sa CSWS.
Nag-deploy na ang City Health Office og mga medical team aron mohatag og tabang sa mga evacuees nga nanginahanglan og atensyong medikal. Anaa usab sa mga evacuation site ang mga social workers nga nag-profile sa mga apektadong pamilya ug nag-apod-apod og pagkaon, mga suplay, ug psychosocial support.
Gipahimangnoan ang publiko nga magmatngon, mag-amping, ug sundon ang mga mando sa lokal nga kagamhanan aron malikayan ang dugang kadaot.
Samtang, usa ka 25-anyos nga lalaki ang nakit-ang patay sa Sitio Ganghaan, Barangay Paknaan sayo sa buntag.
Sumala sa inisyal nga imbestigasyon, nakita ang biktima sa Barangay Ibabao nga nagdagan paingon sa usa ka taxi nga gianod usab sa baha. Gituohang misulay siya og luwas sa maong sakyanan, apan kapin sa pipila ka oras ang milabay, napalgan ang iyang lawas ug ang taxi sa mangrove area sa Paknaan.
Sa laing bahin, usa ka pamilya sa Barangay Paknaan nga nagbangutan pa sa ilang kabanay ang napugos og alsa sa lungon tungod sa baha. Ang tubig baha misaka hangtod sa liog, hinungdan sa dakong kadaut sa ilang panimalay.
