Mipahibalo si Ukrainian President Volodymyr Zelensky nga siya mobiyahe sa White House aron makigtagbo kang US President Donald Trump karong Lunes, Agosto 18.
Kini aron hisgutan ang pagtapos sa gubat sa iyang nasud nga Ukraine.
Ang gikatakda nga pagbisita ni Zelensky sa White House nagsunod sa usa ka summit o one-on-one nga miting tali ni Trump ug Presidente sa Russia nga si Vladimir Putin sa Anchorage, Alaska kaniadtong Sabado, Agosto 16.
Bisan kung si Trump napakyas sa pagsiguro sa usa ka kasabutan uban ni Putin bahin sa gubat sa Ukraine, sila gikataho nga nakahukom sa pagtrabaho sa usa ka kasabutan sa kalinaw aron hingpit nga tapuson ang gubat tali sa Russia ug Ukraine ug dili lamang usa ka ceasefire.
Kahinumdoman nga kontrobersyal ang kataposang tigom tali ni Zelensky ug Trump sa Oval Office sa White House sa Washington DC niadtong Pebrero 28 ning kasamtangang tuig human natapos sa panaglalis ang bilateral meeting tali sa duha nga miresulta sa pagkanselar sa gikatakdang pagpirma sa rare earth mineral agreement ug gi-escort si Zelensky sa White House.
