Gikompirmar sa International Criminal Court (ICC) Registry nga nakadawat sila og kinatibuk-ang 303 ka mga aplikasyon aron ilhon sa korte ang mga biktima sa war on drugs ni kanhi Presidente Rodrigo Duterte og makaapil sa proceedings sa kaso ni kanhi Presidente.
Matod sa Victims Participation and Reparations Section (VPRS), limitado lang kini kon itandi sa gidaghanon sa mga biktima sa war on drugs nga gustong moapil sa kaso.
Base sa report sa nasangpit nga ICC Registry, desidido ang mga biktima nga makab-ot ang hustisya ug gustong motabang sa mga husay.
Kalabot niini, ang nasangpit nga ICC registry nagtrabaho na aron sa pagpahibalo ug pagtabang sa mga biktima, partikular na niadtong nalambigit sa nangaging mga lakang sa korte alang sa transparent ug inclusive nga proseso.
Matod niya ang ICC Registry nakahatag na og application forms nga sinuwat sa Tagalog, Cebuano, English ug French ug nagpahigayon og mga tigum aron sa pagpahibalo sa mga potensyal nga aplikante sa ilang mga katungod ug sa proseso.
Ang Registry niingon usab nga nagpahigayon kini og preliminary assessment sa mga gisumiter aron makumpirma ang pagkatawo sa matag aplikante, ingon man ang risgo nga ilang giatubang ug aron masusi pag-ayo kung sila ba adunay kalabotan sa crimes against humanities nga giatubang batok ni kanhi Presidente Duterte.
Ang mga identidad sa mga aplikante naestablisar pinaagi sa mga dokumento sama sa voter’s ID, barangay IDs ug certified affidavits nga matud pa sa ICC Registry naaprobahan kaniadto sa korte ug kinahanglang dawaton.
Ang confirmation of case batok sa kanhi Presidente gikatakda nga magsugod sa Septyembre 23.
