Nahimong pugad sa mga kriminal nga sindikato ang Department of Public Works and Highways (DPWH) sumala ni Senador Ping Lacson.
Matod sa senador, nakadawat siya og bag-ong impormasyon nga nagpakita sa mga operasyon nga daw mafia sa pipila ka engineering offices sa ahensya sa nagkadaiyang dapit sa nasud.
Gibutyag ni Lacson nga daghang mga opisyal sa DPWH ang nalambigit sa mga anomalosong flood control projects, apil na ang wala maapil sa report nga gisumiter ngadto kang Presidente Ferdinand Marcos Jr.
Dugang niini nga adunay daghang “malalis” sulod sa ahensya, sama sa mga district engineers nga nagmaniobra sa proyekto ug bisan ang Philippine Contractors Accreditation Board nga adunay mga kaugalingong anomaliya.
Gitataw ni Lacson nga dili lang sa Bulacan ang maong mga aktibidad nga sama sa sindikato kon dili lakip na sa ubang lugar sama sa San Carlos City sa Negros Occidental.
Kaniadto iyang gibutyag ang korapsyon sa mga proyekto sa pagpugong sa baha sa Pampanga, La Union, ug Oriental Mindoro sa iyang privilege speech.
Dugang pa sa senador nga nakadawat siya og report bahin sa mga kuwestiyonableng kontrata nga gihatag ngadto sa mga fly-by-night contractors sama nila ni Darcy ug Anna Builders nga nakadaog og flood control projects sa Bulacan.
Ang mas grabe pa, sumala ni Lacson, ang papel sa pipila ka mga magbabalaod nga nagduso og “insertions” sa budget alang sa maong mga proyekto.
Tungod sa kakuwang sa transparency, wala sila mailhi ug nagpabiling immune sa tulubagon.
Gipasiugda ni Lacson nga ang kahakog maoy nagduso sa korapsyon sa 2025 General Appropriations Act, diin mas dako nga alokasyon ang napunta sa DPWH kay sa sektor sa edukasyon, butang nga supak sa Konstitusyon.
Dugang pa niya nga bisan ang subsidy sa PhilHealth naapektuhan tungod sa mga realignment nga gihimo aron paboran ang mga proyekto sa pipila ka “funders.”
Iyang gitataw nga mao kini ang rason nganong padayon siyang nanawagan sa hingpit nga transparency sa proseso sa budget aron mailhan ug manubag ang mga magbabalaod nga nalambigit sa mga anomaliya ug ghost projects.
