Gipasalig sa Malacañang nga dili tugotan ni Presidente Ferdinand Marcos Jr. ang mga kuwestiyonableng proyekto nga maapil sa 2026 national budget.
Partikular nga giila ni Rep. Puno ang mga prayoridad nga proyekto gikan sa iyang distrito nga nawala sa NEP.
Kini ang tubag sa Palasyo human sila si House Deputy Speaker Ronaldo Puno ug Marikina Representative Marcy Teodoro nibutyag nga duna silay nakitang mga kwestyonableng proyekto ubos sa 2026 National Expenditure Program (NEP).
Samtang gipahibalo usab ni Presidente Marcos Jr. nga niabot na sa iyaha ang mga isyu sa kwestyonableng mga proyekto nga nalakip sa 2026 National Expenditure Programs (NEP).
Sa ambush interview ni Presidente Marcos, iyang gibutyag nga bisan pa sa iyang hugot nga kampanya batok sa mga anomaliya nga proyekto sa flood control projects, aduna gihapoy mga indibiduwal nga wala matarog ug kuwestiyonableng gihapon ang mga proyekto.
Gumikan niini, gipasiugda sa Presidente nga panahon na nga limpyohan ug ihan-ay ang tanan aron hingpit na nga mahunonog ang mga anomalosong proyekto sa imprastraktura.
Una nang gipahibawo sa Hepe Ehekutibo nga manubag ang mga opisyal ug kontraktor nga nalambigit sa anomalosong mga proyekto sa pagpugong sa baha.
Sa pagkakaron, ang usa ka Independent Committee anaa sa proseso sa pagporma aron imbestigahan ang mga anomaliya sa mga proyekto sa imprastraktura.
Gusto sa Presidente nga ang Independent Committee gilangkuban sa mga forensic investigator, mga abogado, ug mga prosecutor nga morepaso sa ebidensya ug morekomendar sa Department of Justice (DOJ) ug sa Ombudsman sa pagpasaka ug tukmang kaso batok kang bisan kinsa nga mapamatud-an nga sad-an.
