Nagsugod na sa pagpangandam ang Bureau of Fire Protection–7 (BFP-7) alang sa posibleng pagsaka sa mga insidente sa sunog sa dakbayan sa Sugbo.
Hilabi na nga naila ang Pilipinas nga adunay pinakataas nga panahon sa pagselebrar sa Pasko nga nagsugod ning buwan sa Setyembre.
Matod sa tigpamaba sa Cebu City Fire Station nga si SFO3 Wendell Villanueva, faulty electrical wiring, substandard Christmas lights, unattended appliances, kandila, ug firecrackers ang nag-unang hinungdan sa sunog atol sa “ber” months.
Gani, niadtong Agosto, ang buhatan nakatala og labing menos 10 ka insidente sa sunog, ingon man niresponde usab ang mga bombero atol sa pagbaha sa downtown Cebu, Guadalupe, Talamban, ug pipila ka bukirong barangay.
Gipaambit usab niini nga ang BFP-7 nagpadayon sa paglusad sa ilang Oplan Ligtas Pamayanan fire safety seminars sa mga barangay ug gikatakdang ilusad ang Oplan Paalala Iwas Paputok sa dili pa ang holiday season.
