Hinay-hinay na nga mikunhod ang mapintas nga mga protesta nga nahitabo sa Indonesia, sumala sa usa ka Filipino nga magtutudlo nga nakabase sa West Jakarta.
Kini ang gipadayag ni Felixberto Vedrio Robillo, ang Bombo International Correspondent sa Indonesia, sa eksklusibong pakighinabi sa Bombo Radyo Cebu News team. Matod ni Robillo, mas mikalma na ang mga nagprotesta, dili na sama sa ka-grabe sa mga nangaging adlaw.
Gidugang niini, nga ang kalinaw nga gibati karon sa kadalanan resulta sa direktiba ni Indonesian President Prabowo Subianto nga putlon ang kontrobersyal nga dugang allowance sa mga miyembro sa Parliament (MPs) sa ilang nasud.
Sa miaging mga adlaw, misamot ang kalagot sa katawhan human sa kamatayon sa usa ka food delivery driver nga nadasmagan sa usa ka armored police vehicle.
Ang maong sakyanan gituohang mo-abog unta sa mga batan-ong nagrally batok sa mga kurakot nga polisiya ug pamaagi sa ilang mga politiko.
Sumala sa Department of Foreign Affairs (DFA), wala’y nalambigit o naangol nga Filipino sa mga kagubot nga nahitabo sa nag-unang siyudad sa Indonesia, bisan pa man sa kalapad sa lihok protesta.
Padayon ang pagbantay sa kahimtang sa Indonesia samtang naglatid pa ang mga diskusyon sa ilang nasudnong politika.
