Gisaway sa Malacañang ang kampo sa magtiayong kontraktor nga sila si Cezarah “Sarah” ug Pacifico “Curlee” Discaya tungod sa pag-angkon nga ang ikaduhang hugna sa Philippine Film Heritage Building (PFHB) construction project wala atimana sa ilang construction firm.
Sa usa ka pamahayag, gitambagan ni Palace Press Officer Claire Castro ang mga Discayas nga balikon ang tanang kasamtangang kontrata sa usa sa ilang siyam ka kompanya, ang Great Pacific Builders and General Contractor, Inc., uban sa Department of Public Works and Highways (DPWH).
Matud pa niini nga mamahimong nakalimtan sa magtiayon ang ilang mga pasalig, kung gikonsiderar ang daghang mga proyekto nga ilang nakuha gikan sa gobyerno ug gihimug-atan nga sayup nga kasayuran nga ilang gihatag sa media nga maoy hinungdan sa kalibog sa mga tawo.
Giluwat ni Castro ang maong pamahayag human si Cornelio Samaniego, ang abogado sa magtiayong Discaya, niingon nga ang Great Pacific Builders nakakuha pa lang sa unang hugna sa PFHB construction project ug laing construction company ang nagdumala sa ikaduhang hugna.
Apan, si Castro kay niingon nga ang Great Pacific Builders “boluntaryong misulod” sa usa ka kontrata nga kasabutan alang sa Phase 2 sa proyekto uban sa representante sa DPWH nga si Manny Bulusan gikan sa Office of the District Engineer.
Dugang pa niini nga ang mga Discayas miuyon sa pagpatuman sa mga “trabaho” ubos sa Contract ID No. 230H0119: Local Program/ National Building Program/ Buildings and other Structures- Multi-Purpose/Facilities – Construction sa FDCP Film Heritage Building sa Intramuros, Manila sa kinatibuk-ang presyo sa kontrata nga P107,983,255.11.
Hinungdan nga nipasidaan si Castro sa posibleng legal action batok sa mga Discaya tungod sa dili maayo nga structural design ug palpak nga pagtukod sa PFHB.
