CEBU- Gibutyag sa magsisibya nga si Edward Ligas nga mosumiter kini og bag-ong request alang sa usa ka “urgent investigation” sa Senate Blue Ribbon Committee, may kalabotan sa giingong mga anomalya sa daghang flood control projects sa lalawigan sa Sugbo.
Matud pa ni Ligas, gikinahanglan ang usa ka malukop nga imbestigasyon sa kaulohan, human kining makakuha og bag-ong dokumento ug ebidensya, partikular na sa mga proyekto sa Malabuyoc ug Ginatilan, nga giila nga apektado sa maong kontrobersiya.
Ang lakang ni Ligas nasubay sa nahitabong kalit nga kausaban sa liderato sa Senado, diin gipuli ni Sen. Vicente “Tito” Sotto III si Sen. Francis “Chiz” Escudero isip Senate President. Lakip usab sa giusab mao ang liderato sa Senate Blue Ribbon Committee, diin gihulipan si Sen. Rodante Marcoleta ni Sen. Panfilo “Ping” Lacson.
Gipasiugda sa magsisibya, nga ang Senado na angay mosusi sa maong mga proyekto, ilabi na kay millones nga pondo ang gitumong para sa flood control, apan hangtod karon gipangutana gihapon kung tinuod ba kining natuman ug transparent ang proseso.
Gikuwestiyon usab ni Ligas kung kinsa gyud ang contractor sa 47 ka flood control projects sa Dakbayan sa Sugbo, ug nganong wala motingng sila Cebu City South District Rep. Eduardo “Edu” Rama Jr. ug North District Rep. Rachel “Cutie” Del Mar bahin sa maong isyu.
Gilangkob usab niini ang matud pa kuwestiyonableng 51 ka mga flood control projects sa dakbayan sa Mandaue, nga giingung adunay budget nga P3.8-bilyones.
Nanghinaot si Ligas nga hatagan ug kahigayunan ang mga Sugboanon nga makapresentar sa kaulohan aron usab maimbestigaran ang mga kahiwiang proyekto nga anaa sa Sugbo.
Gipahibalo usab niini nga magtukod sila ug broad coalition kauban ang nagkalain-laing grupo aron sa pagpahigayun ug rally, aron sa pagpadayag sa kasagmuyo batok sa korapsyon sa Department of Public Works and Highways.
