Mimando ang korte sa pagpadakop kang kanhi Philippine Charity Sweepstakes Office (PCSO) general manager Royina Garma tungod sa pagpatay kang PCSO board secretary Wesley Barayuga niadtong 2020.
Sa warrant of arrest nga giluwatan sa Mandaluyong Regional Trial Court (RTC) branch 279, gipadakop usab sila si kanhi National Police Commission (NAPOLCOM) commissioner Edilberto Leonardo, police officials Jeremy Causapin, Santie Mendoza, ug Nelson Mariano tungod sa kasong murder ug frustrated murder.
Matud ni PNP spokesperson Brig. Gen. Randulf Tua o, ilang isilbi ang nasangpit nga warrant of arrest bisan unsa pa ang posisyon niini.
Sa lima ka akusado, si Mendoza lang ang anaa sa floating status ubos sa kustodiya sa Personnel Holding and Accounting Unit (PHAU) samtang si Mariano natangtang sa serbisyo ug si Causapin ni-resign sa iyang katungdanan.
Kahinumduman nga si Barayuga gipusil samtang anaa sa sulod sa iyang sakyanan sa wala mailhing mga suspek nga nagsakay og motorsiklo niadtong Hulyo 30, 2020 sa Mandaluyong City, diin nakaluwas usab ang iyang drayber.
