PROVINCE OF CEBU- Naabot sa dakbayan sa Lapu-Lapu ang kapin sa 864 ka kahon o sobra sa 30,000 ka botelya sa tubig nga gihatag alang sa mga biktima sa linog sa Amihanang Sugbo.
Ang maong tubig gikan sa Tacloban City ug gidala gamit ang duha ka C-130 nga military aircraft sa Philippine Air Force ug usa ka eroplano sa Japan Air Self-Defense Force.
Ang distribusyon sa maong hinabang gipahigayon atol sa joint training exercise nga “Doshin-Bayanihan”, usa ka bilateral nga kalihokan tali sa Pilipinas ug Japan nga nagtumong sa Humanitarian Assistance and Disaster Relief (HADR).
Kung diin, ang Philippine Air Force maoy nag-unang ahensya sa koordinasyon niini uban sa suporta sa Japanese counterparts.
Sa wala pa moabot sa Lapu-Lapu, ang mga military aircraft mihunong una sa Daniel Romualdez Airport sa Tacloban City aron ikarga ang maong mga ayuda.
Ang mga hinabang gikan sa Office of Civil Defense sa Region 8, ug tungod sa kadaghan sa kargamento, mitabang usab ang mga miyembro sa Bureau of Jail Management and Penology (BJMP) sa Region 8 sa pagpanghakot ug pag-andam niini alang sa transportasyon.
Gipakita usab sa kasundalohan ang ilang airdrop exercise, diin ilang ipakita kung giunsa ang paghulog sa mga ayuda gamit ang parachute, kabahin sa ilang disaster relief training.
Apan, giklaro sa mga opisyal nga dili gamiton ang airdrop sa aktuwal nga paghatud sa ayuda sa Northern Cebu.
Hinuon, ikarga kini sa mga military truck gikan sa airbase sa Lapu-Lapu City paingon sa mga apektadong lugar.
