Mipahibawo ang bag-ong gitudlo nga Ombudsman nga si Jesus Crispin ‘Boying’ Remulla, nga himuon niyang abli sa publiko ang Statement of Assets, Liabilities, and Net Worth o SALN sa mga opisyal sa gobyerno.
Sigon niini sa iyang unang adlaw isip ikapitong Ombudsman, nga mohimo siya og bag-ong polisiya aron adunay ‘access’ ang katawhan sa nahisgutang dokumento.
Matod usab niini nga sunod semana, plano niya nga moluwat dayon og memorandum aron maporma ang mga lagda sa pagpangayo og kopya sa dokumento.
Apan matod nini nga gikonsiderar pa ang mga implikasyon o epekto niini ilabi na sa seguridad sa nasud aron dili kini magamit.
Sa laing bahin, gipaambit usab ni Ombudsman Boying Remulla nga nagplano siya nga balikon ang isyu kalabot sa eskandalo sa Pharmally.
Matud pa niya nga ang nasangpit nga kaso i-review ug balikan sa panahon sa miaging pandemya sa nasud.
Sigon ni Ombudsman Remulla, hatagan og pagtagad ang maong isyu gumikan kay daw nakalimtan ug nalubong na sa kalimot ang isyu sa Pharmally.
Gihimug-atan niini nga dili kini angay kalimtan ug angayan lang nga balikon kini aron maklaro ug matino ang hingpit nga kamatuoran.
Kahinumduman nga sa miaging hearing sa Senate Blue Ribbon Committee, gituki ang isyu kalabot sa binilyon nga pundo nga gipalit sa Department of Health alang sa overprice nga medical supplies atol sa kataas sa pandemya.
Dugang pa, giangkon ni Ombudsman Remulla nga dili siya kapamilyar sa nasangpit nga isyu tungod kay wala matud pa niya kini gitutokan pag-ayo.
Gipasalig usab niini nga walay mabiyaan bisan unsa pa nga posisyon ang mapamatud-ang responsable sa kontrobersiya.
Matod niya nga ang basehan niini mao ang ebidensya nga makapakita o makapamatuod sa kalambigitan sa opisyal.
