Kusganong gihimakak ug gikondenar sa pamunuan sa Armed Forces of the Philippines (AFP) ang mga malisyosong alegasyon nga mikatap sa internet bahin sa giingong P15 bilyon nga military ghost projects gikan sa 2023 hangtod 2025.
Matud ni AFP Public Affairs Office (PAO) Chief Col. Xerxes Trinidad, nga ang mga alegasyon pulos bakak, iresponsable, ug klaro nga gituyo aron pakauwawan ang institusyon ug ang liderato niini.
Giklaro ni Trinidad nga wala kini nag-implementar o nagpundo sa bisan unsang mga proyekto sa imprastraktura.
Dugang sa AFP Official, ang tanang pasilidad sa militar ubos sa Infrastructure for Peace and Security (TIKAS) program gipondohan ug gipatuman sa Department of Public Works and Highways (DPWH).
Bisan pa nga girekomendar sa AFP ang mga proyekto nga gibase sa mga kinahanglanon sa operasyon sama sa barracks, mga pasilidad sa pagbansay, ug mga edipisyo sa punoang buhatan, ang pondo direkta nga gihatag sa DPWH.
Gidawat lang sa AFP ang nahuman nga mga proyekto ug wala y apil sa proseso sa pagpamalit, engineering, o ang pag-audit.
Hinungdan nga giawhag sa AFP ang publiko, ilabina sa iyang mga kaubang media, nga magmabinantayon ug responsable sa pagpaambit sa impormasyon online.
Ingon man nga magpabiling lig-on ang AFP sa pagpasiugda sa transparency, integridad, ug accountability sa tanang kalihokan niini ug dili kini madala sa walay basehanan nga pagbutangbutang batok sa mga katungdanan ug serbisyo ngadto sa katawhan.
