Gipahinumdoman sa Manila City Government ang publiko nga mag-andam kanunay sa posibleng kusog nga linog, nunot sa sunod-sunod nga pagtay-og sa nagkadaiyang dapit sa nasod.
Gimanduan ni Mayor Francisco “Isko Moreno” Domagoso ang mga opisyal sa 896 ka barangay sa Manila nga siguruhon nga andam ang ilang tagsa-tagsa ka mga lugar kung adunay kusog nga linog.
Matod sa mayor nga andam ang dakbayan pinaagi sa Manila Disaster Risk Reduction and Management Office (MDRRMO), Manila Health Department (MHD), ug uban pang lokal nga ahensya aron daling makaresponde sa bisan unsang katalagman.
Giawhag usab ni Moreno ang mga tunghaan, pribadong kompanya, ug mga buhatan sa gobyerno sa pagpahigayon og dungan nga earthquake drills isip pagpangandam sa gitawag nga “Big One.”
Nunot niini, gitay-og og 5.0 magnitude nga linog ang Cabangan, Zambales kagahapon hinungdan sa temporaryong pagbakwit sa pipila ka mga tinun-an sulod sa University of Santo Tomas isip kabahin sa ilang precautionary measures.
