Nipasalig ang Kagamhanan sa Probinsiya sa Sugbo ngadto sa publiko nga nagpabiling luwas ang pagbiyahe paingon sa probinsiya bisan pa sa magnitude 6.9 nga linog nga miigo sa amihanang Sugbo niadtong Setyembre 30, 2025.
Kini ang gipaniguro ni Cebu Governor Pamela Baricuatro nga samtang ang Bogo City ug ang mga lungsod sa San Remigio, Medellin, Daanbantayan, Tabogon, Tabuelan, ug Sogod ang naapektuhan sa linog, ang pagbiyahe sa Sugbo hilabi na sa sentro ug habagatang bahin niini kay nagpabiling luwas.
Sa giluwat nga travel advisory diin nakalatid nga ang negosyo sama sa naandan sa Mactan Cebu International Airport (MCIA) sa Lapu-Lapu City ug sa mga pantalan sa Sugbo, ingon man sa Cebu City, kay padayon ang operasyon aron ang mga bisita magpadayon sa pagbisita ug paggawas nga wala’y bisan unsang kahasol nga resulta sa linog.
Ingon man nga giawhag sa kagamhanan ang mga bisita nga magpabiling magbinantayon ug kanunay nga magmonitor sa lokal nga mga balita ug sa Philippine Institute of Volcanology and Seismology (Phivolcs).
Gitambagan usab ang mga travelers nga makig-alayon sa ilang mga travel agencies, transport providers, MCIA, o Cebu Port Authority alang sa up-to-date nga impormasyon.
