Nipadayag sa iyang dakong palasalamat si Presidente Ferdinand Marcos Jr. sa tanang responders, volunteers, government agencies, ug sa tanang niabag ug nihimo sa paspas nga pagtukod og recovery efforts sa mga naapektuhan sa linog, ilabi na sa Philippine Red Cross kinsa nagpahamtang og pipila ka mga butang sama sa pag-istalar og swimming pools ingun man ang gipahigayon nga movie watching ngadto na sa mga bata sa Bogo City, Cebu.
Gihimug-atan sa Presidente nga kini nga mga lakang sa Red Cross dako gayud og tabang ilabi na sa hisgutanan sa mental health sa mga bata, samot nga gikan pa kini sa dili nindut nga kaagi tungod sa 6.9 magnitude nga linog nga niigo sa Amihanang bahin sa Sugbo niadtong Setyembre 30.
Busa, ang president nidayeg og dako sa nagpadayon nga relief ug recovery efforts alang sa mga biktima sa linog sa Northern Cebu nunot sa sunod-sunod nga on-site inspection niini ngadto sa San Remigio Tent City, Cebu Provincial Hospital – Bogo City, Bogo Tent City, ingun man sa bag-ong Bayanihan Village sa San Remigio, Cebu niadtong Oktubre 17, 2025.
Sa maong inspeksyon sa Bayanihan Village, gipangulohan usab kini sa Department of Human Settlements and Urban Development (DHSUD), diin adunay 20 sa 45 ka modular shelter units (MSUs) ang gi-turn-over isip temporaryong pinuy-anan sa mga pamilya kansang mga balay hingpit nang naguba o gi-designate nga no-build zones human sa magnitude 6.9 nga linog n.
Ang matag cluster sa modular shelters naglakip sa shared comfort rooms, lavatories, kuryente, suga, ug saktong bentilasyon aron masiguro ang kaharuhay ug kaluwasan sa mga pamilya.
