Gi-report sa Department of Health (DOH) ang pagkunhod sa mga kaso sa influenza-like illnesses (ILI) sa unang duha ka semana sa Oktubre.
Matod pa kay Health Promotion Bureau Director Tina Marasigan, nga kapin 6,400 ka kaso sa ILI ang natala sa tibuok nasud niadtong Setyembre 28 hanggtod Oktubre 11.
Mas ubos kini og 39% kon itandi sa 10,740 ka kaso nga natala gikan sa Septiyembre 14 hangtod 27 ning tuiga.
Ang datos usab kay 25% nga mas ubos kung itandi sa kapin sa 8,600 nga mga kaso sa sakit nga natala sa parehas nga panahon sa 2024.
Hinuon gipasabot sa opisyal nga posibleng mausab pa ang gidaghanon tungod sa padayong monitoring nila.
Una nang giklaro ni Health Secretary Ted Herbosa nga walay plano ang ahensya nga magpatuman og lockdown tungod sa pagkuyanap sa maong sakit sa niaging mga semana, partikular na sa mga estudyante, nga misangpot sa pagkanselar sa klase sa Metro Manila.
Matod sa kalihim, ang ILI usa ka seasonal respiratory disease busa walay flu outbreak. Dugang pa, matod niya dali nga mokatap ang maong sakit ilabi na sa panahon sa ting-ulan busa girekomendar nga magsul-ob og face mask o magpabilin sa balay kon mataptan sa maong sakit aron malikayan nga makapanakod.
Ang DOH padayon nga nagpahinumdom sa publiko nga manghugas og kamot kanunay, magtabon sa ilang baba ug ilong kung mo-atsing o mag-ubo, ug matulog sa saktong oras, mokaon og masustansyang pagkaon ug pag-inom og daghang tubig.
Sa mga makabatyag ug simtomas sama sa hilanat, ubo, sakit sa tutunlan ug panakit sa lawas, kinahanglang magpabilin sa balay aron dili makapanakod, moinom ug tambal sama sa paracetamol sa hilanat ug magpakonsulta sa doktor o sa pinakaduol nga health center.
