Gibasura na sa buhatan sa Ombudsman ang isyu sa pagkonsiderar nila ni Curlee ug Sarah Discaya isip mga state witness maylabot sa flood control scandal.
Sumala ni Assistant Ombudsman Mico Clavano, ang tigpamaba sa opisina, wala nay paglaum ang mga Discaya nga matawag isip mga state witness.
Matod niya nga kini tungod sa pamahayag sa magtiayon ug sa klaro nga kakulang sa kooperasyon ug kolaborasyon sa gobyerno kalabot sa nagpadayon nga imbestigasyon niini sa anomaliya sa mga proyekto sa flood control.
Busa, imbes nga tawagon isip mga state witness, gikonsiderar na karon sa Ombudsman ang mga Discaya isip ‘hostile witnesses’ sa kaso.
Dugang niya nga tungod kay dili na sila isipon nga ‘state witnesses’, ang magtiayon motungha na isip mga respondents o akusado sa mga reklamo o kaso nga gisang-at sa Ombudsman batok kanila.
Sumala ni Assistant Ombudsman Clavano, mahimo silang mag-atubang og mga kaso sa malversation of public funds, falsification of public documents ug uban pang mga kasong kriminal.
Dugang nga gipahayag ni Assistant Ombudsman Clavano nga ang magtiayon dili gyud makalikay sa tulubagon tungod kay ang mga Discaya miapil sa kapin sa 4,000 ka mga bid sa proyekto.
Busa, hugot nga gipadayon sa tigpamaba nga ‘imposible’ nga matuman ang ilang tumong nga mahimong ‘state witnesses’ sa kaso.
Dugang pa ni Assistant Ombudsman Clavano nga subay sa dili na pagtinabangay sa mga Discaya, ang proteksyon nga gihatag sa gobyerno sa magtiayon, nga unta gilakip sa ilang testimonya, bawion usab.
Gipasabot niya nga ang proteksyon nga gihatag kanila sukad sila nag-apply alang sa programa sa proteksyon sa Department of Justice nga adunay tumong nga mahimong state witnesses.
