Gikumpirma sa US Navy nga miabot na sa Caribbean ang usa ka pwersa sa US Naval Strike uban sa USS Gerald R Ford, ang pinakadako nga barkong panggubat sa kalibutan.
Sa usa ka pahayag, giingon sa US Navy nga ang ilang strike group misulod sa lugar nga responsibilidad sa US Southern Command, nga nagdumala sa Latin America ug Caribbean, niadtong Martes, Nobyembre 11 (US eastern time).
Ang strike group naglakip sa kapin sa 4,000 ka mga sailors ug dosena ka mga eroplano, lakip ang mga guided-missile destroyer ug lainlaing mga barko.
Sumala sa tigpamaba sa Pentagon nga si Sean Parnell, ang pwersa magpalig-on sa kapasidad sa Amerika sa pag-ila, pagmonitor ug pagpugong sa mga ilegal nga aktor ug ilegal nga mga kalihokan nga makadaot sa seguridad ug kauswagan sa Amerika ug makatabang usab sa pagsamok sa narcotics trafficking ug mga kriminal nga grupo sa rehiyon.
Ang pag-abot sa strike group, nga gimando ni US President Donald Trump sa miaging bulan, nahitabo taliwala sa nagpadayon nga kampanya batok sa giingong mga drug boat ug tensyon tali sa US ug Venezuela.
Ang Presidente sa Venezuela nga si Nicolas Maduro ug uban pang mga opisyal kaniadto nag-akusar sa US nga nagmugna sa krisis, nga nagtumong sa pagpukan sa left-wing socialist government sa Venezuela.
Sa pagkakaron, ang US nakalunsad na og 19 ka pag-atake batok sa mga sakayan nga giingong nagdala og ilegal nga droga nga moagi sa Caribbean ug sidlakang Pasipiko, nga nakapatay og 76 ka tawo.
