Nanawagan si Manila Archbishop Cardinal Jose Advincula sa militar ug pulis nga magpabiling matinud-anon sa ilang gipanumpaang katungdanan ug sa katawhan human sa iyang pamahayag nga ang nasud karon nag-atubang og lawom nga krisis sa moral ug espirituhanon tungod sa isyu sa korapsyon ug kakuwang sa pagsalig sa mga institusyon.
Sumala ni Advincula, ang katawhan kinahanglan nga mosunod sa “rule of law” ug hugot nga mosalikway sa bisan unsang panawagan alang sa mga lakang nga dili konstitusyonal.
Dugang pa niini nga ang pagkamaunongon sa matag lungsuranon kinahanglan nga naka-focus sa nasud ug mga prinsipyo sa demokratiko, dili sa bisan unsang personalidad o personal nga interes.
Giawhag usab niya ang publiko nga magmaalamon ug mag-amping sa pagdawat ug pagpaambit sa impormasyon.
Gihimug-atan niini nga katungdanan nato isip mga Kristiyano ang pag-verify sa impormasyon nga atong nadawat ug paglikay sa pagpakatap sa bisan unsa nga wala pa mapamatud-i.
