Gibasura sa Commission on Elections (Comelec) ang petisyon sa disqualification nga gisang-at batok kang Cebu Gov. Pamela Baricuatro tungod sa ilang giingon nga mga kakulangan sa proseso sa reklamo.
Gisang-at ang petisyon, ni Katrina Kaye Kowalik, kanhi pangulo sa social media unit sa Kapitolyo nga Sugbo News, nag-alegar nga si Baricuatro nakalapas sa mga probisyon sa “Fair Election Act” ug may kalabutan nga resolusyon sa Comelec atol sa nakalabay nga Mayo 12 nga national ug lokal election.
Gipasangil ni Kowalik, ang usa ka page sa social media nga mipagawas og usa ka survey nga nagpakita nga si Baricuatro nanguna nga adunay 82 porsyento, nga matud pa niini nga usa ka iregularidad sa eleksyon.
Nasayran sa Comelec First Division, nga gipetsahan niadtong Nobyembre 4, nga napakyas si Kowalik sa pagtuman sa mga kinahanglanon nga proseso nga gilatid sa Comelec Resolution 11046.
Lakip sa mga kakulangan nga gikutlo, ang petitioner wala maglakip sa Certificate of Candidacy ni Baricuatro, usa ka kritikal nga dokumento nga gikinahanglan aron mapamatud-an ang mga alegasyon.
Gipangayu sa mga sakop sa media ang habig ni Baricuatro, apan mibutyag si Aldwin Empaces, ang Assistant Provincial Administrator sa kapitolyo, nga wala ray reaksyon nga gipagawas ang Gobernadora, sanglit nakapokus kini sa iyang umaabot nga mga plano.
