CENTRAL VISAYAS- Gipasidunggan ang mga bayaning bombero sa BFP Search and Rescue Force gikan sa Bohol, Regions 9, 10, CARAGA ug BARMM tungod sa ilang dakong kontribusyon sa search, rescue, ug retrieval operations human sa trahedyang gidala ni Bagyong Tino.
Ang pagpasidungog gihimo atol sa Close-Out Ceremony sa BFP Region 7 karong adlawa, Nobyembre 21, 2025.
Gipangulohan ang seremonya ni FC/SUPT Fred Trajeras Jr., Regional Director sa Bureau of Fire Protection (BFP) Region 7, nga mapasalamaton sa kaisog, kabaskog, ug walay puas nga dedikasyon nga gipakita sa SRF teams sa ilang pagtubag sa panginahanglan sa mga biktima.
Matod ni Trajeras, wala pa hingpit nga natapos ang operasyon tungod kay aduna pa’y 44 ka tawo nga padayon pang gilantaw ug gipangita sa ilang mga team.
Gani, gitino niini nga adunay dugang puwersa nga moabot gikan sa Region 5, lakip na ang ilang K9 units, aron ipadayon ang suporta ug aksyon sa pagpangita sa mga nawagtang.
