Gipalapdan sa usa ka abogado ang pagpasar sa “attire decency ordinance” sa kagamhanan sa Sugbo, nga gipasiugda ni Konsehal Sisinio Andales diin nakalatid sa maong sugyot ang pagsilot sa mga indibidwal nga magpakita nga naka topless o dili desente sa mga pampublikong lugar.
Sa pakighinabi sa Bombo Newsteam kang Atty. Abelardo Quilaton Jr., Attorney-at-law CEO/Owner sa Quilaton Law Office, unang gikumpirmar niini nga ang maong ordinansa kay sulod sa constitutional gumikan ang City Council kay adunay katungod sa pagpasa ilawom sa local governemnt code ug gitawag kini nga delegated authority.
Dugang niini, ang paghimo og ordinansa usa ka act of delegated Police power ug kini kay usa ka regulatory in measure apan dili siya ‘absolute’ kay kinahanglan nga i-balanse usab kini sa constitutional rights sa mga katawhan.
Ingon man nga ang ordinansa kinahanglan nga mapasar sa duha ka test, una ang gitawag nga lawful subject test nga nagpasabot nga ang ordinansa kay nagtumong sa kaayuhan sa katawhan, kaluwasan, public moral, public decency, ug public order.
Samtang ang ikaduha, dili lang sa rason sa pag-practice sa police power kondi ang pamatasan sa pagpatuman diin ang pamaagi kay responsable, dili diskriminatory, dili hanap ug labaw sa tanan dili molapas sa constitutional rights sama sa freedom of expression ug daghan pa.
Apan dili ang katawhan ang makasulti kung nakalapas ba kini sa ilang katungod gumikan ang korte lang ang makahukom kung aduna ba’y pag-abuso o bakaha paglapas sa police power of the state.
Nakaani og daghang pagsaway ang maong ordinansa sa publiko, ingon man ang pagpukaw sa atensyon nga ang mga sakop sa kapulisan ang usa sa mga mangulo sa pagpatuman.
Gipasabot ni Atty. Quilaton nga ang pag-abag sa mga kapulisan kay dili paglapas sa balaod inay sila lang ang mag-enforce, ingon man nga mamahimo usab ang mga city hall legislator apan kinahanglan gayud nga tabangan sila sa mga sakop sa kapulisan.
Apan, gitataw niini nga kung sobra rasab ang ordinansa nga makaligis na sa ubang konstitusyonal kay mamahimo kini nga gamiton isip legal nga pag-pangutana sa Korte.
