Nangandam na ang kapulisan sa siyudad sa Sugbo sa ipahigayon nga Anti-Corruption rally nga himuon sa nagka lain-laing sector sa katilingban sa karong adlawa, Domingo, Nobyembre 30, 2025.
Matod ni Police Lieutenant Colonel Jose Losbaños, ang Information Officer sa Cebu City Police Office (CCPO) nga nag andam na sila og mga personnel sama sa Civil Disturbance Management team (CDM) nga tahasan nga mo bantay sa dapit diin didto ilusad ang mga programa.
Lakip sa ilang ipakatap ang mga sakop sa Tactical Motorcycle Riding Unit ug mga uniform personnel nga mag silbing perimeter security aron masiguro nga hapsay ug walay mahitabong kasamok sa ilang mga kalihukan.
Subay niini, gipasalig sa CCPO nga ilang ipatuman ang maximum tolerance ug gi-respeto nila ang tanang katungod sa mga Sugboanon nga mopadayag sa ilang yango-ngo sa gobyerno.
Samtang wala una mohatag og impormasyon si Losbaños kung pila ka polis ang ilang ipakatap apan iyang gipaniguro nga gatusan ang ilang ipagawas gawas sa ubang ahensya sa gobyerno sama sa Cebu City Transportation Office, Traffic Enforcement Unit, Bureau of Fire ug Cebu City Disaster Risk Reduction and Management Office.
Gani, gitinguha nila nga dili mabalda ang dagan sa trapiko diin kadtong mga mo byahe ug kadtong dalhon sa tambalanan mamahimong maka agi.
Nunot niini, nag-awhag lang ang kapulisan sa Dakbayan sa Sugbo sa mga mosalmot sa rally nga mosunod lang sa lagda sa gobyerno ug dili babagan ang mga agi-anan aron dili mahasol ang ubang tawo nga dunay importante nga mga lakaw.
